Мәдрәсә шәкертләре күренекле хәзрәтләр, халкыбызның атаклы танылган шәхесләре, иҗат кешеләре белән очрашуларны көтеп алалар. Мондый чаралар җанлы аралашу, үзеңне кызыксындырган сорауларга җавап табу белән үзенчәлекле. Ислам динен кабул итүгә 1000 ел исемендәге мәдрәсәдә читтән торып уку бүлеге шәкертләре белән очрашуга күренекле остазыбыз, Татарстанның баш казые Җәлил хәзрәт Фазлыев килде. Ул шәкертләр каршында вәгазь сөйләде һәм алар тарафыннан бирелгән күп кенә сорауларга җавап бирде.
Җәлил хәзрәт авылда имам-хатыйб, районда имам-мөхтәсиб, Татарстанның баш казые буларак, үз тәҗрибәсеннән чыгып кайбер нечкәлекләр хакында бәян кылды. Диннең торышына бәя биргәндә ул нәкъ менә имамчылык вазыйфасын алган кешенең өстендә булган җаваплылыкка басым ясады. Җәлил хәзрәт шулай ук динебездә мөһим булган кагыйдәләргә тукталды. Гыйбадәт, никах, әхлакый мәсьәләләргә басым ясап китте. Шәкертләрнең саны елдан-ел арта бара. Йөздән артык шәкертләр төрле төбәкләрдән (Самара, Ульян, Чувашия, Киров, Мәскәү, Свердловск, Башкортстан, Пермь, Мари-Эль һ.б.) гыйлем алу нияте белән килгәннәр.
Җәлил хәзрәтнең чыгышын зал тутырып очрашуга килгән шәкертләр игътибар белән тыңлады. Аның гади тормыштан алынган мисаллар белән баетылган зур чыгышы шундый тирән гыйлемле дин әһелләре белән аралашуга сусаган шәкетләр өчен бик файдалы булды. Мәдрәсә мөдире Ильяс хәзрәт Җиһаншин Җәлил хәзрәткә мәдрәсә мөгаллимнәре, шәкертләр исеменнән рәхмәт сүзләрен җиткерде.
