Бүген Татарстан Республикасы мөселманнары Диния нәзарәтендә “Оешма менеджменты” юнәлеше буенча яңа һөнәри эшчәнлек алу курсларын тәмамлаучыларга дипломнар тапшыру тантанасы узды. Быел Татарстан мәдрәсәләре, Россия ислам институты һәм Казан ислам университетыннан әлеге курсларда 22 кеше укып дипломнар алды. Ул профессиональ эшчәнлекнең яңа төрен – мәгариф оешмалары җитәкчеләренә һәм урынбасарларына идарә итү өлкәсендә һөнәри эшчәнлекне алып барырга мөмкинлек бирәчәк.
Җаваплы урыннарда эшләүче дини мәгариф оешмалары вәкилләрен Татарстан мөфтие Камил хәзрәт Сәмигуллин исеменнән аның беренче урынбасары Рөстәм хәзрәт Вәлиуллин сәламләде. Ул алган белемнәрне эштә дөрес итеп файдаланырга чакырды һәм уку-укыту эшен нәтиҗәле итеп оештыруда зур уңышлар теләде: “Мәдрәсәләргә, дини югары уку йортларына укырга кергән һәрбер шәкертнең беренче көннәрдән мәчетләр белән багланышта торып, ныклы тәҗрибә үтүләрен теләр идем. Бүгенге көндә чыгарылыш студентларының тирән белем алулары белән беррәттән, гамәли күнекмәләргә дә ия булулары таләп ителә”.
Алга таба тантаналы шартларда квалификация курсларын үтеп, сынауларны уңышлы тапшырган дини мәгариф оешмалары вәкилләренә – барлыгы 22 тыңлаучыга Татарстан мөфтиенең беренче урынбасары Рөстәм хәзрәт Вәлиуллин кулыннан дипломнар тапшырылды.
Әлеге чарада шулай ук КФУ Ресурс үзәге җитәкчесе урынбасары Марат Сафин, Психология һәм мәгариф институты директорының фән эшләре буенча урынбасары Тимерхан Алишев катнашты.
