Бүген Татарстан мөфтие Камил хәзрәт Сәмигуллин Дагыстанның танылган дин галиме Алигаджи Сайгидгусейнов белән очрашты.
Якыннан аралашу, ислам фәннәре буенча фикер алышуга корылган чара Татарстан мөфтиятендә узды.
Камил хәзрәт Сәмигуллин Татарстан җирлегендә ислам тарихы, аерым алганда татар халкының ислам дөньясында тоткан урыны, казанышлары хакында сөйләде. Мөфти хәзрәт кунакны Татарстан мөселманнары Диния нәзарәте эшчәнлеге белән таныштырды, атаклы татар галимнәре турында сөйләде. Шулай ук Галимҗан Барудиның яшәгән йортын, ул эшләгән “Мөхәммәдия” мәдрәсәсен күрсәтте.
Җылы, дусларча аралашуны оештырганы өчен, Алигаджи Сайгидгусейнов Татарстан мөфтиятенә рәхмәтләрен җиткерде: “Камил хәзрәтне күптәннән беләм. Мин аның гадилеген яратам. Бүгенге очрашуда ачыктан-ачык итеп күп мәсьәләләрне уртага салып сөйләштек, аерым алганда, ислам гыйлеменә, фәненә караган тәҗрибәне дәвам итү”.
Очрашу барышында Камил хәзрәт Сәмигуллин “Хозур” нәшрияты бастырган җыентык-китапларны бүләк итте, кунак та аңа үзенең соңгы фәнни хезмәтләрен тапшырды.
