Бүген, җөмәдәл-ахыр аеның 27 нче көнендә, Татарстан мөфтие Камил хәзрәт Сәмигуллин IX Бөтенроссия Коръән укучылар һәм хафизлар бәйгесендә җиңүче Ильяс Сабиров белән очрашты. Әлеге конкурс 21-22 февральдә борынгы Болгар шәһәрендә үткәрелеп, анда Россиянең 14 төбәгеннән вәкилләр катнашты.
Тумышы белән Буа районыннан булган Ильяс Сабиров әлеге бәйгенең “Кәлам-Шәрифне дөрес уку” номинациясендә җиңү яулады.
Җиңүче хәзерге вакытта Казан ислам университетының Коръән хафизлар әзерләү үзәгендә белем ала. Мөфти Камил хәзрәт Сәмигуллин һәм аның мәгариф буенча урынбасары, БИА, РИИ һәм КИУ ректоры Рәфикъ Мөхәммәтшин шәкерткә киләчәктә дә Коръәнне ятлауда уңышлар теләде.
Бәйгедә җиңүче сөйләп узганча, Ильяс Коръәннең 25 җүзен яттан белә һәм киләчәктә Россия данын халыкара конкурсларда якларга ниятли. Аның Коръән укучылар бәйгесендә чыгыш ясау тәҗрибәсе 2012 елдан килә: ул Россия ислам институтында узган “Җүз-гаммә” бәйгесендә катнашып, Гран-при яулаган. Шулай ук Индонезиядә Коръәннең ун җүзен яттан белү конкурсында, Мароккода “Коръәнне дөрес уку” конкурсында катнашкан.
Кәлам-Шәрифне өйрәнү һәм ятлаудагы казанышларын югары бәяләп, Татарстан мөфтие IX Бөтенроссия Коръән укучылар һәм хафизлар бәйгесендә җиңүче Ильяс Сабировны хаҗга сертификат белән бүләкләде. Ул әлеге юллама белән “Стандарт” программасы буенча хаҗ кыла алачак.
Исегезгә төшерәбез, IX Бөтенроссия Коръән укучылар һәм хафизлар бәйгесе Ислам Лигасының Бөтендөнья Коръән-хафизлар һәм Сөннәт эшләре оешмасы, Болгар ислам академиясе, ТР мөселманнары Диния нәзарәте һәм «Коръән нуры» хәйрия фонды тарафыннан оештырылды.
