Бу көннәрдә Татарстан мөфтие Камил хәзрәт Сәмигуллин Дубайда IX еллык инвестицион форумда (Annual Investment Meeting (AIM) 2019) катнашу нияте белән ТР Президенты Р.Н.Миңнеханов җитәкчелегендәге рәсми делегация составында Берләшкән Гарәп Әмирлекләренә эшлекле сәфәр кыла. Бүген, Шәгъбан аеның өченче көнендә, республика мөселманнары башлыгы әлеге эшлекле форумны ачу тантанасында катнаша. Чараның төп темасы – «Турыдан-туры чит ил инвестицияләренең киләчәген чагылдыру: цифрлы глобальләштерү аша бөтендөнья икътисадын баету». Җыен кысаларында Камил хәзрәт Сәмигуллин пленар утырышта, Берләшкән Гарәп Әмирлекләре бизнесы һәм рәсми хакимияте вәкилләре белән, шулай ук форумга башка илләрдән килгән катнашучылар һәм дин галимнәре белән очрашырга ниятли. Әйтик, кичә хәзрәт Дубайда Изге Коръәннең халыкара Дубай премиясе үзәгенең Коръәнне әзерләү Комиссиясе җитәкчесе, шәех Мәэмүн Әр-Рави белән очрашты. Алар Коръәнне өйрәнү, Коръән-хафизларны әзерләү, Коръән басмаларын һәм тәфсирләрен бастыру өлкәсендә хезмәттәшлек юнәлешләре турында фикер алышты.
ТР Президенты матбугат хезмәте фотолары файдаланылды.
