Бүген, Рамазан аеның 2-нче көнендә - Җиңү көне алдыннан, Казанның «Туган авылым» милли комплексында Бөек Ватан сугышы ветераннары һәм тыл хезмәтчәннәре өчен ифтар үткәрелә. Чарага бөтен республикадан 40тан артык кеше чакырылган. Хәйрия ифтарының хөрмәтле кунакларын Татарстан мөфтие Камил хәзрәт Сәмигуллин сәламләячәк. Ул мәҗлестә катнашучыларны Изге Рамазан ае һәм Җиңү көне белән тәбрик итәчәк, Коръән аятьләре укып, вәгазь белән чыгыш ясаячак. Ветераннар хәзрәткә ияреп җәмәгать намазын укыр һәм авыз ачар дип көтелә. Шулай ук булачак бәйрәмнең сәбәпчеләре узган еллардагы вакыйгалар турындагы хатирәләре белән уртаклашачак. Аларның һәркайсына Рамазан ае һәм Җиңү көне уңаеннан ТР мөселманнары Диния нәзарәтеннән күчтәнәчләр тапшыру күздә тотыла.
Шунысын билгеләп үтәргә кирәк: ветераннар өчен ифтарлар Татарстанның башка шәһәр һәм районнарында да уздырылачак.
Хәйрия чарасын ТР мөселманнары Диния нәзарәте «Туган авылым» милли комплексы белән берлектә оештыра.
