Рамазан аеның 28 нче көнендә, якшәмбе, Саба районында зур ифтар узды. Авыз ачу мәҗлесе Саба районы башлыгы Рәис Миңнеханов ярдәме белән оештырылды. Мәҗлестә шәрәфле кунак булып Татарстан мөфтие Камил хәзрәт Сәмигуллин катнашты. Аның вәгазьләрен тыңларга һәм ахшам намазын укырга 700дән артык мөселман кардәшебез җыелган иде. Авыз ачар алдыннан ул Рамазан аеның фазыйләтләре турында сөйләде һәм бүгенге көндә соңгы таравих намазын башкарасы бар, дип искәртте.
- Иртәгә Рамазан аеның соңгы көне җитә. Бу изге ай мәчетләрдә ифтар һәм сәхәрләр, Рамазан ае очрашулары һәм рухи әңгәмәләр, бергә күп кешене җыйган таравих намазлары белән күңелләребездә мәңгегә калыр, - дип мөрәҗәгать итте ул ифтарда катнашучыларга һәм Рамазан тәмамланганнан соң да изге гамәлләр кылырга чакырды.
Кичә күмәк намаз һәм авыз ачу белән дәвам итте.
