Иртәгә, Зөлкагдә аеның 14-нче көнендә, Казанда “Сөйләшә торган куллар” проекты буенча ун көнлек тернәкләндерү курслары башлана. Әлеге проект ишетмәүчеләр һәм начар ишетүчеләрне тернәкләндерүгә юнәлтелгән.
“Ярдәм” милли ислам хәйрия фонды 2000 нче еллар башында үз эшчәнлеген ишетмәүчеләр һәм начар ишетүчеләр өчен курслар оештырудан башлап җибәргән иде. Бу эш әле дә дәвам итә. Алар өчен беренче тапкыр курслар 2004 елда Левченко бистәсендәге “Сөләйман” мәчетендә узды.
Тернәкләндерү курслары даими рәвештә оештырыла. “Сөйләшә торган куллар” проекты кысаларында ишетмәүчеләр һәм начар ишетүчеләр белем дә ала, тернәкләнү дә уза. Әлеге проектның нигезен алар өчен махсус эшләнгән белем бирү программасы тәшкил итә.
Ишетмәүчеләр һәм начар ишетүчеләр ислам нигезләрен “Ярдәм” милли ислам хәйрия фондының укыту-тернәкләндерү үзәге директоры Мәликә Гыйльметдинова тарафыннан эшләнгән методика буенча өйрәнә. Ул ишетмәүчеләрне һәм күрмәүчеләрне өйрәтү юнәлешендә танылган белгеч. 2007 елда Мәликә Гыйльметдинова ишарәләр телен өйрәнә һәм танылган татар дин галимнәре хезмәтләре буенча ишетмәүчеләр өчен “Ислам нигезләре” курсыннан белем бирү өчен махсус методика эшли.
Тернәкләндерү курсларында шулай ук компьютерда эшләргә, кул эшләренә өйрәтәчәкләр, йорт эшләре дәресләре узачак. Ишетмәүчеләргә ишарәләр телендә мөселман терминнары төшендереләчәк. Ишетмәүчеләр һәм начар ишетүчеләр белән психологлар эшләячәк. Алар шулай ук массаж сеанслары алачак.
Тернәкләндерү курсларыннан тыш, уку елы дәвамында ишетмәүчеләр һәм начар ишетүчеләр өчен сурдотәрҗемә ярдәмендә рухи темаларга лекцияләр үткәрелә. Ә якшәмбе көнне алар Коръән укырга өйрәнә. Җомга вәгазе дә сурдотәрҗемә белән узачак.
Курсларны ачу тантанасы 17 июльдә сәгать 10.00-да Казан шәһәре, Серов урамы, 4 А адресы буенча була.
