Кичә, Зөлкагдә аеның 19-нчы көнендә, Чаллы шәһәренең Сидоровка бистәсендә урнашкан үзәкләштерелгән корбан чалу мәйданчыгында Корбан бәйрәменә әзерлек буенча киңәшмә узды. Чарада Чаллы мөхтәсибәте, шәһәрнең Комсомол районы администрациясе, Эчке эшләр идарәсе, ветеринария, янгын сүндерү хезмәтләре, шәһәр транспорты предприятиесе вәкилләре катнашты. Киңәшмә барышында Корбан бәйрәмен уздыруга кагылышлы оештыру мәсьәләләре каралды. Мал чалганда, ветеринария-санитария таләпләрен үтәү, корбан чалу урынында тәртип һәм чисталык тәэмин итү мөһимлегенә басым ясалды.
Яр Чаллының Сидоровка бистәсендә урнашкан үзәкләштерелгән корбан чалу мәйданчыгында корбан чалу йоласы быел 9 нчы тапкыр башкарылачак. Корбанлыклар белән тәэмин итүчеләр шәһәрлеләр өчен бирегә өч меңгә якын терлек алып килер дип көтелә – бу сан узган ел дәрәҗәсендә. Корбан малларының күпчелеген, гадәттәгечә, Тукай, Актаныш, Зәй, Минзәлә, Сарман, Менделеевск районнарыннан алып киләчәкләр.
Яр Чаллыда Корбан гаете буенча чираттагы киңәшмәне бәйрәмгә бер атна кала уздыру ниятләнә.
Искәртеп үтик: Корбан бәйрәме быел 11 августта билгеләп үтеләчәк.
