Бүген, Зөлхиҗҗә аеның 28 көнендә, төнге сәгать 01.00-дә Казан аэропортына Татарстан хаҗиларының соңгы төркеме кайтты. Шулай итеп, республикабызның “ДУМ РТ Хаҗ” рәсми хаҗ операторы аша изге җирләргә сәфәр кылган барлык ватандашларыбыз да туган җирләренә исән-имин кайтып җиттеләр. Шунысын искәртеп үтәргә кирәк: быел барлыгы 1800 татарстанлы хаҗ кылды.
Изге урыннар белән иң соңгы булып саубуллашкан кардәшләребез автобус белән Дубайга килгәннәр, очкычка утырып башта Мәскәүгә, аннары Казанга очканнар. Әлеге хаҗиларның күбесе – Түбән Кама районыннан. Төнге 01.00-дә Казан аэропортында изге сәфәрдән кайтучыларны Түбән Кама автобус предприятиесеннән бирелгән транспорт көтеп торды. Иртәнге 06.00-да кардәшләребез Түбән Камага килеп җиттеләр, аларны биредә якыннары, туганнары каршы алды. Алар барысы да шат елмаеп, изге җирләргә сәфәр кылу мөмкинлеген биргән Аллаһы Тәгаләгә ихлас рәхмәтләрен белдереп бер-берсен сәламләделәр: Раббыбыз хаҗ гыйбадәтен кабуллардан кылсын, алдагы тормышларыбызда чын хаҗи исеменә лаек булып яшәргә язсын!
