Балаларның көзге каникулы вакытында Бөгелмә мөхтәсибәте районның Үзәк мәчетендә “Сәлам” дип исемләнгән рухи-сәламәтләндерү курслары үткәрә. Мәктәп балалары өчен әлеге чара 31-нче октябрьдән 4-нче ноябрьгә кадәр узачак, курсларга барлыгы 40-лап бала язылган.
Малайлар һәм кызлар биш көн дәвамында Ислам нигезләрен үзләштерәчәк, намаз укырга, ата-аналарга һәм өлкәннәргә карата ихтирамлы булырга өйрәнәчәк, остазлардан әдәп-әхлак кагыйдәләре, этика буенча киңәшләр алачак. Шулай ук юл йөрү кагыйдәләре буенча мәгълүмат бирү, сәламәт яшәү рәвешенә карата мәхәббәт тәрбияләү, файдалы үгет-нәсыйхәтләр бирү ниятләнә.
Мәүлид ән-Нәби ае булуын күздә тотып, 4-нче ноябрь көнне Пәйгамбәребез Мөхәммәд салләллаһу галәйһи вә сәлләм турында викторина оештырылачак. Балаларны бүләкләр һәм бәйрәм ашы көтә!
