Кичә, рабигыль-әүвәл аеның 1-нче көнендә, Татарстан Республикасы мөфтие Камил хәзрәт Сәмигуллин Төркиянең Казандагы генераль консулы Исмәт Эрикан катнашында Төркия Республикасының 96 еллыгы уңаеннан оештырылган рәсми кабул итү чарасында катнашты. Кунаклар арасында сәясәтчеләр, җәмәгать эшлеклеләре һәм дин әһелләре, шулай ук эшмәкәрләр һәм массакүләм мәгълүмат чаралары вәкилләре бар иде. Генераль консул Исмәт бәй үзенең сәламләү чыгышында болай дип билгеләп үтте: «Без Төркия белән Россия арасындагы дуслык һәм барлык өлкәләрдә дә хезмәттәшлек дәвам итәчәгенә зур ышанычыбызны белдерәбез. Татарстан Республикасы белән тыгыз элемтәләребез Россия Федерациясе белән мөнәсәбәтләрне ныгытуын ассызыклап үтәсем килә».
