ТР мөселманнары Диния нәзарәтенең «Хозур» нәшрият йорты Мәүлид ән-Нәби уңаеннан «Сез Пәйгамбәребезгә ﷺ карата үз мәхәббәтегезне, аңа булган сөю хисегезне ничек белдерер идегез?» дигән темага уздырылган иҗади эшләр бәйгесенә йомгак ясады.
I урынга һәм 10 мең сум күләмендә акчалата бүләккә рус телендә эссе язган Мәскәү студенты Газинур Мөхитов лаек булды. II урын һәм 5 мең сум татарча эссе авторы, Арча районы Иске Кишет авылында яшәүче Мәүлетдин Галиевка бирелде. III урында – рус телендә эссе иҗат иткән Яшел Үзән кызы, КФУ студенты Галия Гарифуллина, ул исә 3 мең сум күләмендә акчалата бүләккә ия булды.
Махсус бүләк – катнашу өчен диплом һәм «Хозур» нәшрият йорты чыгарган «Сөю нуры» («Светоч любви») китабы Актаныш районы кызы Алсу Хисмәтовага тапшырылды.
