Бүген, Рабигыль-әүвәл аеның 30-нчы көнендә, Яшел Үзәннең Үзәк мәчетендә район Башкарма комитеты җитәкчесе Михаил Афанасьев мөхтәсибәт имамнары һәм Татарстанның Төньяк-көнбатыш төбәге казыйлары белән очрашты. Казыят составына Татарстанның Югары Ослан, Биектау, Яшел Үзән, Лаеш, Питрәч, Балык Бистәсе мөхәтәсибәтләре керә. Республика мөфтие Камил хәзрәт Сәмигуллин чараның мәртәбәле кунагы булды. Очрашу эшлекле киңәшмә форматында узды һәм үзара танышуга юнәлтелде, чөнки Михаил Павлович күптән түгел Яшел Үзән районы Башкарма комитеты җитәкчесе вазыйфасына билгеләнде. Ул районның үсешенә карата үз карашын белдерде һәм Лаеш районы башлыгы булган вакытта ТР Диния нәзарәте белән хезмәттәшлек итүгә бәйле уңай хис-кичерешләре белән уртаклашты. ТР мөселманнары башлыгы Камил хәзрәт Сәмигуллин үз чиратында җәмгыятьне рухи-әхлакый тәрбияләү буенча чараларны тормышка ашыруда Михаил Павловичны хуплады һәм мөхтәсибәт инициативаларына ярдәм күрсәткәне өчен рәхмәт белдерде. Моннан тыш, ул аңа шәһәрдә мәчет төзелешенә җир бүлеп бирү мәсьәләсен карау үтенече белән мөрәҗәгать итте. Бүгенге көндә биредә 3 мәчет эшли, мөхтәсибәттә исә барлыгы 43 мәчет исәпләнә.
Яшел Үзән имам-мөхтәсибе, Төньяк-көнбатыш төбәге казые Габделхәмит хәзрәт Зиннәтуллин мөхтәсибәттә дини өлкәдәге вәзгыять турында сөйләде, имамнарга дини эшчәнлекне «ТР мөселманнары Диния нәзарәте имам-хатыйблары тарафыннан гыйбадәт кылулар һәм дини йолалар үткәрү турында Нигезләмә»гә таянып алып бару кирәклеге турында искәртте.
Алга таба очрашу “сорау-җавап” рәвешендә барды: катнашучылар – имамнар һәм казыйлар – мәчетләрдә алга таба дини эшчәнлекне гамәлгә ашыруга бәйле сораулары һәм тәкъдимнәре белән мөрәҗәгать итә алды. Аерым алганда, мөселман дини йолаларын уздыру тәртибе һәм мөселман зиратлары өчен урыннарны киңәйтү мәсьәләләре каралды.
Утырыш киләчәктә хезмәттәшлек итү буенча үзара килешү белән төгәлләнде.
