Рабигыль-ахыр аеның 2-нче көнендә (29-нчы ноябрьдә) Түбән Каманың “Нур” мәчетендә хәнәфи мәзһәбе кыйммәтләренә багышланган «Пәйгамбәрнең варисы – хәзрәти Әбу Хәнифә» дип исемләнгән чара узды. Кичәдә мәчет каршындагы курсларда укучылар, остазлар, мәчеткә йөрүчеләр – барлыгы йөзгә якын кеше катнашты.
Иң әүвәл кунакларга сәламләү сүзе белән “Нур” мәчетенең хатын-кызлар укыту бүлеге мөдире Фәнзия Әхмәтшина мөрәҗәгать итте. Үзенең чыгышында ул мәзһәбкә иярүнең мөһимлеге, үз эченә имам Әбу Хәнифәнең белем-өйрәтмәләрен алган традицион Ислам кыйммәтләре турында искә төшерде.
Аннары остазлар Имам әл-Әгъзамның тормышы һәм мирасы турында риваятьләр укыдылар. Шулай ук кунакларга Әбу Хәнифә шәхесе турында видеофильм күрсәтелде.
Чара чәй табыны белән тәмамланды. Шулай ук кунаклар укытучылар, хәзрәтләр, остазлар, туган-тумачалар һәм якыннар өчен дога кылдылар һәм алган белемнәрне файдалануда бәрәкәт сорап, Аллаһы Тәгаләгә мөрәҗәгать иттеләр.
