Губернатор Җибрин Ильяс Абед Әл-Бакри җитәкчелегендәге Хеврон (Фәлистыйн) провинциясе делегациясе Татарстан Республикасына килде. Кичә, Рабигыль-ахыр аеның 12-нче көнендә (9-нчы декабрьдә), Фәлистыйн кунаклары эш визиты кысаларында Россия ислам институтында булдылар. Делегатларны РИИның уку-укыту эшләре буенча проректоры Марат хәзрәт Гыйльманов каршы алды.
Визит барышында кунакларны Россия ислам институты китапханәсе, Гарәп каллиграфиясе үзәге, татарларда ислам мәгарифе музее, Электрон һәм дистанцион белем бирү үзәге белән таныштырдылар.
Татарстан территориясендә мөселманнар һәм христианнарның тату яшәүләре күп илләр өчен үрнәк булып тора, дип билгеләп үтте Хеврон губернаторы. Җибрин Ильяс Абед Әл-Бакри шулай ук билгеләп үткәнчә, Россия ислам институты фән һәм мәгариф өлкәсендә Хеврон провинциясе ислам университеты белән хезмәттәшлек итә алыр иде.
Үз чиратында РИИның уку-укыту эшләре буенча проректоры Марат Гыйльманов ислам университеты белән халыкара хезмәттәшлек алып баруда кызыксынуларын белдерде. Шулай ук ул билгеләп үткәнчә, бүген РИИ Әл-Әзһәр (Мисыр), Карауин (Марокко) кебек ислам университетлары, шулай ук Малайзия, Индонезия һәм Төркия университетлары белән тыгыз хезмәттәшлек итә.
Очрашу азагында кунаклар җылы кабул итүләре өчен рәхмәтләрен белдерделәр.
Бүген Фәлистыйн делегациясе Татарстан Республикасы мөселманнары Диния нәзарәтендә булачак, анда Хеврон провинциясе губернаторы Җибрин Ильяс Абед Әл-Бакри ТР мөфтие Камил хәзрәт Сәмигуллин белән очрашачак.
