Бүген, җөмәдәл-әүвәл аеның 25-нче көнендә (20-нче гыйнварда), Татарстан Республикасы мөселманнары Диния нәзарәтенең “Зәкят” хәйрия фонды "Шәһәр мәгариф үзәге" өстәмә һөнәри белем бирү хосусый учреждениесе белән берлектә “Хәят” социальләшү үзәгендә агачка бизәк төшерү буенча мастер-класс үткәрде. Әлеге чарада фонд карамагында тәрбияләнүче 6 яшьтән алып 27 яшькәчә булганнар һәм аларның әниләре – барлыгы утызга якын кеше катнашты.
Агач предметларны бизәкләүгә керешкәнче, педагоглар элементларны башкару техникасын аңлаттылар. Аннары балалар кәгазьгә бизәкләр төшерү буенча күнекмәләр ясады, шуннан соң агачтан ясалган әйберләр белән эшләүгә керештеләр. Шунысын да билгеләп үтәргә кирәк, мондый очрашулар балаларга физик күнекмәләрне үстерергә генә түгел, ә балаларны социальләштерүгә дә ярдәм итә.
