11-13 февраль көннәрендә Байлар Сабасы Үзәк мәчетендә мәчет каршындагы курсларда белем бирүче мөгаллимнәр, имам-хатыйблар өчен белем күтәрү курслары уза. Укуларга шулай ук Теләче районы мөгаллимәләре дә килде. Саба мөхтәсибәте тарафыннан оештырылган әлеге чарада бүген лекцияләр белән РИИ һәм КИУ мөгаллимнәре – Казан ислам университетының дини фәннәр кафедрасы мөдире, тарих фәннәре кандидаты Дамир (Сәид) Шәһабиев, ТР мөселманнары Диния нәзарәте Голәмәләр шурасының җаваплы сәркатибе, Казан ислам университетының уку-укыту эшләре буенча проректоры, ислам фәннәре докторы Рөстәм хәзрәт Нургалиев чыгыш ясый. Белемнәрен ныгытырга килүчеләрне Татарстан мөфтие исеменнән нәзарәтнең мәгариф һәм фән бүлеге җитәкчесе Айдар Карибуллин сәламләде.
Укуларның беренче көне иң төп фәннәрнең берсе – гакыйдә мәсьәләләренә багышланды. Кукмара мәдрәсәсе җитәкчесе Ришат хәзрәт Курамшин “Ислам дине нигезләре” уку әсбабы буенча мәчет каршындагы курсларда гакыйдә фәнен укыту буенча лекция сөйләде.
Икенче көнне КИУ остазлары “Исламда дини агымнар”, “Шәригатьнең хәзерге заман сорауларына җавабы” темалары буенча дәресләр алып барды.
Укуларның өченче көне мәчет каршындагы курсларда укыту методикасына багышланачак. Мөгаллимнәр һәм имамнар каршында “Мөхәммәдия” мәдрәсәсе мөгаллиме, “Казан нуры” мәчете каршындагы “Шамил” мәдрәсәсе директоры Камил хәзрәт Вәлиуллин чыгыш ясаячак. Ул ничек итеп Ислам фәннәрен укытырга, нинди методикалар кулланырга кирәклеге хакында бәйнә-бәйнә сөйләячәк, слайдлар күрсәтеп аңлатачак.
“Имамнар һәм мөгаллимнәр өчен әлеге курсларның әһәмияте бәяләп бетергесез. Оештыручыларга зур рәхмәт, дәвамлы булуын телибез”, – дип таралышты катнашучылар.
