Бүген, җөмәдәл-ахир аеның 20-нче көнендә, нәзарәттә Татарстан мөфтие Камил хәзрәт Сәмигуллин РФ мөселманнары Диния нәзарәтенең Приморье краендагы вәкаләтле вәкиле Җамал хәзрәт Гарифуллин белән күреште.
Җамал хәзрәт очрашу барышында үз эшчәнлеге белән таныштырып үтте, Приморье краенда мәчет төзү проекты буенча эш алып бару турында сөйләде. Җамал хәзрәт әлеге мәчет төзеләчәк урынга Татарстан Президенты таш салуы турында искә төшерде. Алга таба хәзрәтләр проект, бу төбәк мөселманнарының яшәеше буенча киңәштеләр.
Камил хәзрәт Сәмигуллин кунакка мәгариф өлкәсендә хезмәттәшлек алу буенча тәкъдимнәр ясады. 2020-2021-нче уку елына Ерак Көнчыгыштан “Мөхәммәдия” мәдрәсәсенә 5 татар егетен укырга җибәрү ниятләнә. “Аларны биредә шәкертләрне татарча укытып, дипломнар алып кайткач, Ерак Көнчыгышта хезмәт итүләрен телибез. Без булачак имам-хатыйбларның татар телен дә яхшы, камил белүләрен шарт итеп куябыз”, – дип белдерде Җамал хәзрәт.
