Татар әдәбияты тарихы музее һәм Татар китабы йорты тарафыннан Халыкара туган тел көненә багышлап уздырылган “Туган тел ул – ...” флешмобында җиңү яулаучылар арасында Татарстан дин әһелләре дә бар. Җиңүче дипломнары белән Чаллы шәһәренең “Ихлас” мәчетеннән Илгиз хәзрәт Сөнгатулла һәм Рузил хәзрәт Ихсанов бүләкләнде. “Флешмобта барлыгы 110-нан артык видеоязма катнашты, шулар арасыннан ун җиңүче билгеләнде. Жюри әгъзалары беренче, икенче, өченче урыннарны чыгарудан баш тартты, нәтиҗәдә, иң яхшы чыгыш ясаучылар чакырылып, дипломнар, бүләкләр тапшырылды”, – дип уртаклашты Рүзил Ихсанов.
Әлеге флешмобта катнашу өчен, «Туган тел ул – ...» сүзләрен дәвам итеп, үз фикереңне белдереп, йә туган телгә багышланган шигырь укып видео төшерергә һәм аны Instagram-га урнаштырырга кирәк иде.
