Рәҗәб аеның 14-нче көнендә (9-нчы мартта) Буа мөхтәсибәте районның “Госман” мәчетендә I сыйныфтан алып IX сыйныфка кадәр укучы малайлар һәм кызлар арасында “Намаз уку бәйгесе” оештырды. Әлеге чарада башлангыч һәм урта мәктәп укучылары көч сынашты. Катнашучыларга үгет-нәсыйхәт сүзләре белән Буа шәһәренең “Хаҗилар” мәчете имамы Фәһим хәзрәт Сөләйманов мөрәҗәгать итте һәм имам-мөхтәсиб Илмир хәзрәт Хәсәновның тәбрикләү сүзләрен җиткерде. Буа мәдрәсәсе мөдире урынбасары Мөслим хәзрәт Кәримов шәкертләргә уңышлар теләп бәйгене башлап җибәрде.
Балаларның чыгышларын мәчет имамнары бәяләде. Бәйге өч номинациядә узды. Беренче номинациядә катнашучы кече яшьтәге мәктәп балалары азан, камәт әйттеләр һәм намазның рөкеннәрендәге хәрәкәтләрне күрсәттеләр. Икенче номинациядә катнашучылардан барлык сүрәләр һәм догалар белән кычкырып намаз укып күрсәтү таләп ителде. Ә югары сыйныф укучылары югарыда әйтелгәннәрне күрсәтеп кенә калмадылар, намазның эчке һәм тышкы шартлары буенча сорауларга җавап бирделәр.
Җиңүчеләр истәлекле бүләкләр белән шатландырылды.
