Кадерле дин кардәшләр! Мөхтәрәм милләттәшләр!
Ислам динендә гаилә коруга, ир белән хатын арасындагы мөнәсәбәтләргә зур игътибар бирелә. Аллаһы Тәгалә гаилә әһелләре арасындагы хокукларның гадел рәвештә үтәлүен таләп итә. Гаиләләр төрле була: бәхетле, ә кемдер бәхетсез. Бала өчен бәхетле гаилә ул зур бер әкияти сарай шикелле, анда әтисе – падишаһ, ә әнисе – патшабикә. Әмма бу фани дөнья камил түгел, шуңа күрә сарайлар да җимерелә, әкиятләр дә эреп юкка чыгарга мөмкин. Мондый чакта бик еш ата белән ана, үзләре дә сизмәстән, баланы бер-берсенә каршы салкын сугышта корал итеп кулланалар. Гәрчә гаилә таркалуда гаебе булмаган бер генә тараф бар, ул – бала. Аллаһ Раббыбыз безгә нарасыйларыбызны үзара үпкәләшләрнең җимергеч дулкыныннан саклар өчен зирәклек һәм сабырлык бирсә иде.
Хәерле Җомга көне теләп, Камил хәзрәт Сәмигуллин
