Нәзарәттә хатын-кызлар өчен “Коръән укырга өйрәнәбез” курслары кабаттан эшли башлады

02 ноябрь 2020 ел 18:32

Бүген, рабигыль әүвәл аеның 16 нчы көнендә (2 ноябрьдә), ТР мөселманнары Диния нәзарәте хатын-кызлар өчен «Коръән укырга өйрәнәбез» дип аталган, тизләтелгән курсларның икенче агымдагысын яңадан башлап җибәрде. Алар гарәп алфавитын белмәгән һәм Коръән уку күнекмәләренә ия булмаган гүзәл затларга исәпләнгән. Билгеле булганча, әлеге курсларның икенче агымдагысы үз эшен 2020 елның февраль аенда башлап җибәргән иде. Әмма пандемия килеп чыгу аркасында, бу курсларның эшчәнлеген туктатып торырга туры килде.  

Әлеге яңа проект – хатын-кызлар өчен «Коръән укырга өйрәнәбез» тизләтелгән курслары, Татарстан мөселманнарының күп санлы үтенечләре буенча, республикабыз мөфтияте тарафыннан 2019 елда башланып киткән иде.  Әлеге башлангыч «Ислам. Беренче адымнар» зур күләмле проектының дәвамы булып тора, аның кысаларында укучылар берничә дәрес дәвамында Ислам нигезләре һәм намаз уку тәртипләрен өйрәнәләр.

Бүген дәресләрне алып баручы остаз Лилия Ильясова, укучыларын сәламләп, «Фатиха» сүрәсен укыды һәм Изге Коръәнне укырга өйрәнү һәм укуның өстенлекләре турында сөйләп, сөекле Пәйгамбәребезнең ﷺ хәдисен китерде. Бу хәдис болай яңгырый: «Әбү Һүрайрадан (радияллаху ганхудан) тапшырыла, Аллаһ Илчесе ﷺ әйткән: «Коръәнне өйрәнегез, аны укыгыз һәм тынычланыгыз; хакыйкатьтә Коръән, һәм аны өйрәнүчеләр һәм аның буенча яшәүчеләр хуш ис белән тулган савытка тиң, ул кайда гына булса да, аннан хуш ис аңкый; ә Коръәнне укырга өйрәнүчеләр һәм, үзеңдә Коръәнне саклап, тынычланучылар хуш ис тулган ябык савытны хәтерләтә”.

«Без бүген сезнең белән иң беренче адым ясыйбыз: Коръән укырга өйрәнәбез. Әгәр Коръәнне укып та, аның турында фикерләмәсәң, фикерләп тә, Коръән буенча яшәмәсәң, бу укуның файдасы булмаячак, – дип мөрәҗәгать итте остаз укучыларына. – Коръәнне болай гына уку бик аз. Иң мөһиме – Коръән укып, безнең йөрәгебез йомшарсын һәм тынычлансын". Коръәнне укырга һәм фикерләргә җиңелрәк булсын өчен, Лилия Ильясова укучыларын гарәп телен өйрәнергә, Коръәннең нәзарәт тарафыннан әзерләнгән татар һәм рус телләрендәге мәгънәви тәрҗемәләрен укырга чакырды.

Тизләтелгән курслар һәр дүшәмбе көнне 16:00 сәгатьтән 18:00 сәгатькә кадәр Казанның Галиев мәчетендә узачак. Гарәп алфавиты, мәхраҗ (авазларның дөрес әйтелеше), тәҗвид (Коръәнне дөрес итеп уку) кагыйдәләре, "Идгам", "Мад" кагыйдәләр төркеме, каты һәм йомшак хәрефләр, тукталыш кагыйдәләре һәм билгеләре буенча 6 дәрес үткәрү планлаштырыла.

“Коръән укырга өйрәнәбез” дип аталган тизләтелгән курслар уза торган Галиев мәчетендә барлык санитар-эпидемиология таләпләре дә үтәлә: курсларны тыңлаучылар медицина битлекләреннән булырга һәм кулларын антисептиклар белән юарга тиеш.

Сурәт - 1
Сурәт - 2
Сурәт - 3
Сурәт - 4
Сурәт - 5
Сурәт - 6
Сурәт - 7
Сурәт - 8
Дин әһеле
1992 -1998 елларда
Дин әһеле
1998 - 2011 елларда
Дин әһеле
2011 – 2013 елларда
Дин әһеле
2013 елның 17 апрелендә сайланды

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана