Бүген, җөмәдел-әүвәл аеның 2-нче көнендә (17 декабрьдә), Россия ислам институтында Ислам фәннәре һәм гарәп теле буенча ислам уку йортлары студентлары арасында XIII Бөтенроссия олимпиадасы ачылды. Әлеге чараны Татарстан мөфтияте, Россия ислам институты Ислам мәдәнияте, фәне һәм мәгарифенә теләктәшлек фонды белән бергәлектә оештыра.
Олимпиаданың максаты – ислам фәннәрен һәм гарәп телен өйрәнүдә сәләтле студентларны ачыклау. Олимпиадада Татарстан, Дагыстан, Чечня, Кабарда-Балкар, Мордовия, Карачай-Чиркәс, Түбән Новгород һәм башка шәһәрләрдән егермедән артык мөселман уку йорты студентлары катнаша.
Олимпиадада катнашучылар бүген Россия ислам институтында өйләгә кадәр “Гарәп теле”, “Дин нигезләре”, “Ислам хокукы”, “Мәдрәсәләрдә ислам хокукы” номинацияләре буенча Олимпиаданың язмача биремнәрен эшли. Өйләдән соң шәкертләр Коръән уку һәм телдән сөйләм буенча биремнәр башкарачак. Конкурсантлар Коръәнне дөрес һәм матур итеп укый белергә, гарәпчә сөйләм күнекмәләрен күрсәтергә тиеш булачак.
18 декабрь көнне сәгать унда Татарстан мөфтие Камил хәзрәт Сәмигуллин катнашында Олимпиадада җиңүчеләрне һәм призлы урыннар алучыларны бүләкләү тантанасы узачак.
