Хөрмәтле җәмәгать! Кадерле дин кардәшләрем, милләттәшләрем!
Пәйгамбәребез Мөхәммәд ﷺ болай дип әйткән: «Көнчелектән сакланыгыз. Дөреслектә, утынны янгын ашаган кебек, көнчелек тә изгелекләрне ашыйдыр». Хөсетлек - бик борынгы чир. Хөсетлекнең ахыры – Аллаһы Тәгаләгә көферлек, ә башы – яхшылыкны, нигъмәтне теләмәү. Хәтта, галимнәр: «Көнчелек - Аллаһыга каршы чыккан беренче гөнаһ», – дигән. Һәм бу чыннан да шулай. Хөсетлек чире кешене зур авырлыкларга китерә, аның тормыш ямен бетерә, гөнаһлар, бозыклыклар дөньясына этәрә. Хәтта мөселманнар арасында булган матур гына намаз, уразалар тоткан җирдән кинәт дошманлашып, төрле сүзләр таратып, вөҗдан пычратучыларның сәбәбе көнчелек була. Раббыбыз безне көнчелек чиреннән сакласын!
Хәерле Җомга көне теләп, Камил хәзрәт Сәмигуллин.
