Бүген, җөмәдел-әүвәл аеның 3-нче көнендә (18-нче декабрьдә), 2021 елда Татарстан Республикасында «Туган телләр һәм халыклар бердәмлеге елы»на әзерлек һәм аны үткәрү буенча оештыру комитеты һәм ТР Президенты Рөстәм Миңнеханов рәислегендә ТР Президенты каршындагы Милләтара һәм конфессияара мөнәсәбәтләр буенча советның берләштерелгән утырышы узды. Аның эшендә Татарстан мөфтие Камил хәзрәт Сәмигуллин да катнашты.
Киңәшмә эше кысаларында катнашучылар көн тәртибендәге мәсьәләләр буенча докладлар һәм чыгышлар тыңлады. Аннары ТР Президенты Рөстәм Миңнеханов җитәкчелегендәге делегатлар 2021 елда Татарстанда Туган телләр һәм халыклар бердәмлеге елын уздыру буенча төп чараларның республика планы проектын хуплады. Моннан тыш, катнашучыларга Туган телләр һәм халыклар бердәмлеге елын уздыру буенча төп чараларның республика планы тәкъдим ителде. Аерым алганда, киләсе елда төрле милли бәйрәмнәр, фестивальләр, конкурслар, айлыклар, күргәзмәләр, конференцияләр, семинарлар һ.б. үткәрү ниятләнә.
ТР Президенты матбугат хезмәте фотолары файдаланылды
