ТР Президенты Аппараты җитәкчесе Әсгать Сәфәров Балтач районының Бөрбаш авылында «Ярдәм» милли ислам хәйрия фондының малайлар өчен төзелгән мөселман пансионатында булды. Биредә ул пансионат эшчәнлеге белән танышты һәм шәкертләр белән очрашты.
Кунакларны «Ярдәм» милли ислам хәйрия фонды Советы рәисе Илдар хәзрәт Баязитов, Татарстанның баш казые, Балтач районы имам-мөхтәсибе Җәлил хәзрәт Фазлыев, «Ярдәм» милли ислам хәйрия фонды президенты Илһам Исмәгыйлев, шулай ук Балтач районы башлыгы Рамил Нотфуллин, ТР Дәүләт Советы депутаты Камил Нугаев һәм башкалар озатып йөрде.
Әсгать Әхмәт улы уку сыйныфларын, китапханәне, компьютер сыйныфын, пансионатның спорт залын карады. Ул пансионат эшчәнлеген югары бәяләде, Илдар хәзрәт Баязитовка социаль һәм мәгърифәтчелек эшчәнлеге өчен рәхмәт белдерде. «Ярдәм» фонды проектлары – Татарстан горурлыгы», – дип билгеләп үтте Әсгат Сәфәров.
Бөрбаш авылында «Ярдәм» мөселман пансионаты 2018 елда ачылды. Бүген пансионатта Россиянең төрле төбәкләреннән җыелган 18 ир бала тәрбияләнә.
