Чистай мөхтәсибәтендә яшьләр өчен «ЯшьStories» исемле яңа проект старт алды. Ул аралашу мәйданчыгы буларак эшли, анда яшьләр үзләренең тормыштагы кызыклы вакыйгалары белән уртаклашалар, актуаль мәсьәләләр турында фикер алышалар. Яшьләр клубы утырышлары җирле Ислам үзәгендә уза.
Яшь мөселманнарның беренче очрашуы узган якшәмбедә узды. Чара башында Чистай районы имам-мөхтәсибе һәм проектның авторы Мөхәммәт хәзрәт Кыямов, ислам үзәге, Бөтенроссия татар конгрессы һәм аксакаллар Чистай бүлегенең җитәкчесе Фәрит Галимов сәламләү сүзе белән чыгыш ясадылар. Очрашу танышу форматында узды, аннан соң катнашучыларга яшьләр гимнын язарга тәкъдим иттеләр. Чараның икенче өлешендә яшьләр тормыштагы кызыклы вакыйгалары белән уртаклаштылар, аларның һәркайсы үзенчәлекле: кемдер кыенлыкларны җиңеп чыгарга өйрәтте, кемдер үз эшләрен ничек уңышлы башларга киңәш итте һ.б. Очрашу Габдулла Хәйбуллин башкаруындагы иҗади номер белән тәмамланды.
«Гаджетлар» темасына чираттагы очрашу 21 февральдә 16:00 сәгатьтә узачак.
Белешмәләр өчен телефон: +7 (903) 307-87-39.
