Бүген, җөмәдәл-ахыр аеның 28 көнендә (10 февральдә), «Татар-информ» мәгълүмат агентлыгында «Васыятьнамә – киләсе буыннарга әйтер сүз» бәйгесенә багышланган матбугат очрашуы узды. Әлеге чарада «Гаилә» мәчете имам-хатыйбы, бәйгенең жюри рәисе Рөстәм хәзрәт Хәйруллин, оештыру комитеты җитәкчесе Сиринә абыстай Шаһимәрданова, шулай ук Татарстан Дәүләт архивы директоры Илдар Шәфыйков һәм ТР Министрлар Кабинеты ЗАГС идарәсенең әйдәп баручы белгече Фәния Фәйзуллина катнашты.
Рөстәм хәзрәт Хәйруллин иң элек әлеге бәйгенең «Гаилә» мәчете тарафыннан Татарстан мөселманнары Диния нәзарәте, Татарстанның архив эше буенча дәүләт комитеты, Татарстан Республикасы Министрлар Кабинетының Гражданлык хәле актларын теркәү идарәсе, ТР Нотариаль палатасы, Россия мөселман эшкуарлары берлеге, Бөтендөнья татар конгрессы «Милли шура»сы белән берлектә уздырылуын искәртеп үтте. Аның сүзләренчә, беренче бәйгегә 17 эш тапшырылган булса, икенче елда жюри әгъзалары 54 васыятьнамәне бәяләгән. Оештыручылар быел бәйгедә катнашучылар тагын да күбрәк булыр, дип өметләнә. Бу нияттән, традицион чәчмә яисә шигъри формадагы васыятьнамәләрдән тыш, бәйгедә яңа «Видео-васыятьнамә» номинациясе кертелде. Хәзер бәйгедә катнашучылар, нәселләрендә буыннан-буынга күчеп килә торган васыятьнамәне видеога төшереп, үз социаль челтәрләрендә #васыятьнамә хэштегы белән урнаштыра ала.
Әлеге бәйгене уздыру тәкъдиме белән чыккан Сиринә абыстай Шаһимәрданова бүген матбугат очрашуы вакытында васыять язуның әһәмиятен тагын бер кат ассызыклап узды. Ул шулай ук үз әтисенең һәм Габделхак хәзрәт Саматовның васыятьнамәләреннән мисаллар китерде. Илдар Шәфыйков, үз чиратында, Татарстан архивында саклана торган борынгы васыятьнамәләр үрнәкләре белән таныштырды. Аларда да, матди мирасны бүлү мәсьәләләре генә түгел, кешеләрнең үз балаларына, нәсел-нәсәбләренә нәсыйхәтләре саклана.
Бәйгегә эшләр 2021 елның 23 маена кадәр кабул ителә.
