Бүген, раҗәб аеның 5-нче көнендә (17-нче февральдә), Татарстан мөфтие Камил хәзрәт Сәмигуллин нәзарәттә Бөтендөнья мөселман берләшмәләре советының генераль сәркатибе ассистенты доктор Хәсән әл-Марзуки җитәкчелегендәге делегация белән очрашты. Делегация составына шулай ук стратегик планлаштыру департаменты башлыгы доктор Мөхәммәд Сәйф әл-Гобәйдли һәм Совет Идарәсе рәисе киңәшчесе доктор Наср Ариф керде. Татарстанга сәфәрнең төп максаты – нәзарәт тарафыннан алып барылган эшчәнлек, проектлар, эш нәтиҗәләре белән танышу.
Делегация әгъзаларын Татарстан мөфтие Камил хәзрәт Сәмигуллин мөфтиятнең нәшрият, мәгариф, яшьләр сәясәте, хәйриячелек юнәлешләре белән таныштырды. Кунаклар белән әңгәмә барышында ул шулай ук татар дин галимнәре Шиһабетдин Мәрҗани, Морад Рәмзи, Муса Бигиев, Галимҗан Барудиның хезмәтләре турында сөйләде, татар дини мирасын өйрәнү, бастыру, киләчәк буыннарга җиткерү алымнары белән уртаклашты. Делегация мөфти авызыннан Darul-kutub.com электрон китапханәсе, Коръән уку кыйраәтләрен өйрәнү, медиапроектлар, яшьләр сәясәтен тормышка ашыру юлларын белеп, “Хозур” нәшрияты тарафыннан басылган күпләгән китаплар белән танышып китте. Моннан тыш, Камил хәзрәт кунакларга күптән түгел Нәзарәттә эшләүче шәригать белгечләренең ислам финанслары өлкәсендә AAOIFI тарафыннан сертификацияләнгән экспертлар исеменә лаек булуларын ассызыклап, очрашуга ислам фәннәре докторы Идрис хәзрәт Кыёмовны чакырып, аның белән таныштырып узды. Кунаклар Коръән-хафиз Сәидкамал хәзрәт башкаруында мөнәҗәтләр тыңлады, мөфтинең спорт белән шөгыльләнүе, хоббилары белән кызыксынды.
