Бүген, Раҗәб аеның 21 нче көнендә (5 нче мартта), Татарстан мөфтие Камил хәзрәт Сәмигуллин ТР Инвестицион үсеш агентлыгы бинасында узган эшлекле очрашуда катнашты. Утырышта шулай ук ТР Авыл хуҗалыгы һәм азык-төлек министрлыгы вәкилләре, ТР Инвестицион үсеш агентлыгы җитәкчесе Талия Миңнуллина һәм ТР мөселманнары Диния нәзарәтенең «Хәләл» комитеты рәисе Ирек хәзрәт Җиһаншин катнашты. Киңәшмә бу җәйдә узачак «Kazansummit-2021» чарасы турында фикер алышуга багышланган иде.
Очрашу кысаларында Камил хәзрәт Сәмигуллин киң колачлы чараны уздыру буенча үз тәкъдимнәре белән уртаклашты. Очрашуда катнашучылар шулай ук тематик мәйданчыклар оештыру һәм саммитта катнашучыларны чакыру буенча кайбер теләкләрен җиткерде.
