Бүген, шәгъбан аеның 20-нче көнендә (2-нче апрельдә), ТР мөселманнары Диния нәзарәте резиденциясендә Татарстан мөфтие Камил хәзрәт Сәмигуллин Россия мөселманнары Дини җыенының спортны үстерү һәм популярлаштыру бүлеге җитәкчесе, Казанның “Әхмәт” көрәш клубы директоры, “Живи спортом” хәйрия оешмасы президенты Тигран Аюбов, UFC көрәшчесе Сәид Нурмагомедов һәм катнаш стиль буенча профессиональ көрәшче Камил Алиметов белән очрашты.
Очрашуда сүз үсеп килүче буынны һәм мөселман яшьләрен физик тәрбияләү юнәлешләре, уртак проектларны гамәлгә ашыру мөмкинлекләре турында барды. Спортчылар яшьләр сәясәтенә һәм спортка зур игътибар биргәне өчен мөфти хәзрәткә рәхмәтләрен белдерделәр, ә ул үз чиратында ТР мөфтиятенең спорт башлангычлары турында сөйләде. Очрашу ахырында мөфти хәзрәт кунакларга “Хузур” нәшрият йортының китапларын бүләк итте.
Спортчылар Казанга “Әхмәт” көрәш клубы директоры Тигран Аюбов чакыруы буенча ММА буенча мастер-класс үткәрү өчен килде.
