Ел саен Рамазан-шәриф аенда мөфтиятнең "Рамазан - изге гамәлләр ае" марафоны кысаларында "Зәкят" хәйрия фонды белән берлектә төрле социаль чаралар уза.
Кичә Казанда "Туган авылым" милли-туристик комплексында мөфтиятнең социаль үсеш бүлеге тарафыннан тормышка ашырыла торган "Яшь килен", "Затлы мәҗлес" һәм "Исламда беренче адымнар" проектларында катнашучылар физик мөмкинлекләре чикләнгән балалар һәм аларның әниләре өчен бәйрәм үткәрде. Балалар һәм әниләр Рамазан ае турында тагын да күбрәк белде, үзләре дә Рамазан аена кагылышлы шигырьләр сөйләде, ислам турындагы табышмакларны чиште. Инде күпләргә таныш Тимур Фазлыев матур йомшак тавыш белән Коръән укыды. Аның шигырьләре дә бик тәэсирләндергеч, күңелләргә үтеп керерлек булды.
Аннан соң төрле яшьтәге балалар әлеге чараны оештыруда катнашкан волонтерлар белән, төсле кәгазьләрдән ябыштырып, әниләренә бүләкләр ясады. Ә әниләр хәерле тормыш, Аллаһ белән бәйле элемтәләрне җайга салу, Рамазан ае турында вәгазь тыңлады.
Балалар өчен матур кичә ифтар мәҗлесе белән тәмамланды.
