Бүген Казанда Россия белән Азәрбайҗан арасында милләтара һәм динара татулык мәсьәләләренә багышланган ике көнлек конференция ачылды. Конференцияне оештыручылар – Президент грантлары фонды һәм Казан федераль университеты ярдәме белән «Үзәк Азияне өйрәнү институты».
Форумда Татарстан мөфтие Камил хәзрәт Сәмигуллин исеменнән сәламләү сүзе белән аның беренче урынбасары Илфар хәзрәт Хәсәнов чыгыш ясады. Илфар хәзрәттән тыш, «Дөнья төзелешендә динара диалогның роле һәм үзенчәлекләре. Волонтерлыкның социаль практикасына диннең йогынтысы» түгәрәк өстәлендә шулай ук “Ярдәм” милли ислам хәйрия фонды президенты Илһам Исмәгыйлев чыгыш ясады. Ул катнашучыларны “Ярдәм” фондының «Тормыш юлы» акциясе мисалында пандемия чорында волонтерлык эшчәнлеге үзенчәлекләре белән таныштырды.
