Бүген, Рамазан аеның 17-нче көнендә (29-нчы апрельдә), нәзарәттә 3-5 июнь көннәрендә узачак Бөтенроссия татар дин әһелләре форумын уздыру мәсьәләләренә багышланган киңәшмә үтте. Утырышта Татарстан мөфтие Камил хәзрәт Сәмигуллин, аның мәгълүмати сәясәт буенча урынбасары Ришат Хәмидуллин, мәгариф буенча урынбасары Рәфикъ Мөхәммәтшин, Бөтендөнья татар конгрессы Башкарма комитеты рәисе Данис Шакиров, Бөтендөнья татар конгрессы Башкарма комитеты җитәкчесенең РФ төбәкләрендәге татар иҗтимагый берләшмәләре белән эшләү буенча урынбасары Марс Тукаев һәм башка җаваплы затлар катнашты.
Очрашуда катнашучылар XI “Милли тормыш һәм дин” Бөтенроссия татар дин әһелләре форумына әзерлек алып бару – махсус экспозиция булдыру, делегатлар чакыру, чараның төп программасы һәм пленар утырышта яңгыраячак төп сораулар буенча фикер алышты.
Нәзарәт һәм конгресс вәкилләре дин әһелләре җыенында яңгыраячак төп фикерләрдән татар мирасын, милли киемнәрне, туган телне саклау гореф-гадәтләрне җиткерү, хәзерге дин әһеленең милли тормыштагы ролен күрсәтү кирәклеген ассызыклап үттеләр.
