Иртәгә дин кардәшләребез ислам динендә иң мөһим көннәрнең берсен – Ураза гаетен каршы ала. Бу көнне иртәдән Татарстанның барлык мәчетләрендә гает вәгазьләре һәм намазлары укылачак. Казан шәһәренең Галиев мәчетеннән исә гаетнең турыдан-туры трансляциясе оештырылачак. Татарстан мөселманнарының башлыгы, мөфти Камил хәзрәт Сәмигуллинның гает вәгазен һәм мәчеткә килгән мөселманнарның җәмәгать белән укыган гает намазын туры эфирда “ТНВ Татарстан», «ТНВ Планета» һәм “Хозур ТВ” телеканалларында, шулай ук ТР МДН-ның dumrt.ru сайтында һәм «Хозур ТВ»-ның YouTube-каналында күзәтеп булачак.
Республиканың гает хөрмәтеннән узган төп чаралары Галиев мәчетеннән 13 майда иртәнге сәгать 5.30-дан күрсәтелә башлаячак. Бу вакытта татар хафизлары башкаруында Коръән укуны тыңлап булачак. 6.00-дә мөфти Камил хәзрәт Сәмигуллин гадәттәгечә Татарстан өммәтенә гает вәгазе белән мөрәҗәгать итәчәк. Аңа ияреп җәмәгать белән укылган гает намазын иртәнге 6.30-да карап булачак.
Ураза гаетенең трансляциясен шулай ук кабатлау рәвешендә дә карарга мөмкин. 13 май көнне «ТНВ Татарстан» каналында ул 10.00 сәгатьтә күрсәтеләчәк.
