Изге Рамазан аеның беренче көнендә Татарстан Республикасында Диния нәзарәте башлангычы белән традицион «Рамазан - игелекле эшләр ае» хәйрия марафоны старт алган иде. Пандемия аркасында килеп чыккан катлаулы икътисади вәзгыятькә карамастан, Татарстан мөселманнары акция кысаларында күпсанлы социаль әһәмияткә ия проектларны тормышка ашыруда актив катнаштылар. Нәтиҗәдә, Диния нәзарәтенең «Зәкят» хәйрия фонды 30 көн эчендә, битараф булмаган татарстанлылар ярдәме белән, авыру балаларны дәвалауга, азкеремле гаиләләргә азык-төлек ярдәме күрсәтүгә акча җәлеп итә алды.
Шулай итеп, Татарстанның төрле почмакларыннан 19 авыру балага дәвалану курсларын түләү өчен акча җәлеп ителде. Бу акчалар аларга баш миенең арахноидаль кистасы, ВВС, ДЦП, спастик тетрепарез, Веста синдромы һ. б. диагнозларга каршы көрәштә ярдәм итәчәк.
Шулай ук Татарстанда Рамазан аенда мөселманнар арасында мохтаҗлар файдасына фитр сәдакасы җыю игълан ителгән иде. Дин кардәшләребезгә уңайлы булсын өчен, акчаны махсус счетка электрон рәвештә күчерү мөмкинлеге булдырылды. Нәтиҗәдә ТР мцселманнары Диния нәзарәте «Зәкят» хәйрия фондының махсус картасына 1 миллион сумга якын акча кергән. Фитр сәдакасы мохтаҗ гаиләләргә акча рәвешендә тапшырыла.
Рамазан аенда ТР мөселманнары Диния нәзарәтенең «Зәкят» хәйрия фонды үзеннән дә Татарстанның азкеремле гаиләләренә азык-төлек ярдәме күрсәтте. Күпбалалы, авыру балалар тәрбияләүче һәм тулы булмаган 790 гаиләгә 5,1 тонна күләмендә азык-төлек җыелмалары, "Мөхәммәдия" мәдрәсәсе шәкертләренә 3 тонна азык-төлек тапшырылды. Моннан тыш, Бөек Ватан сугышында Җиңүнең 76 еллыгы уңаеннан азык-төлек күчтәнәчләрен бөтен республикадан 110 хөрмәтле ветеран алды, алар арасында Татарстан имамнары да бар.
Шулай ук Татарстанның барлык колонияләрендә көн саен ифтарлар да уздырылды. Моның өчен хәйрия акциясе кысаларында ТР мөселманнары Диния нәзарәте 500 тоткынга 5 тонна күләмендә ярымфабрикатлар, яшелчә һәм җиләк-җимеш тапшырды. Тоткыннар өчен махсус туклану һәм гыйбадәт кылу режимы кертелде, шулай ук гает намазлары үтте.
Тагын бер зур социаль чара Рамазан аеның соңгы көнендә узды — Казанда 9 нчы Республика ифтары матәм форматында узды. Аны ТР мөселманнары Диния нәзарәте, «Ак Барс Арена» стадионы һәм «Туган Авылым» милли-туристлык комплексы. Оештырды. Ифтарда 3,5 меңнән артык кеше булды.
Шулай ук Казанның «Ярдәм» мәчете ел саен Рамазан аенда үзенең социаль эшчәнлеген активлаштыра. Бу юлы биредә 50 сукыр һәм начар күрүче мөселманнар өчен «Йөрәк белән күрәбез һәм ишетәбез» дигән бушлай тернәкләндерү курслары узды, ай дәвамында 40 мең кеше - мөмкинлекләре чикләнгәннәр, аз тәэмин ителгән гаиләләр һәм студентлар ифтар җыелмалары алды. Мәчет «Тормыш юлы» акциясе кысаларында азкеремле 500 кешене азык-төлек җыелмалары белән тәэмин иткән.
Рамазан аенда кылынган барлык изге гамәлләрне Аллаһы Тәгалә кабул итсен!
