Бүген, шәүвәл аеның 15нче көнендә (27нче майда), Татарстан Республикасы мөселманнары Диния нәзарәте бинасында яшьләрнең шәүвәл ае ифтары узды. Билгеле булганча, шәүвәл ае уразасы мөселманнар өчен сөннәт булып тора. Бу уңайдан яраткан пәйгамбәребез ﷺ: "Рамазан ае буе ураза тоткан һәм аңа шәүвәл аенда тагын алты көн уразаны өстәгән икән, ул бер ел буе ураза тоткан кебек савап алачак", - дигән. Моннан тыш, Мөхәммәд пәйгамбәрнең ﷺ хәдисендә дүшәмбе һәм пәнҗешәмбе көннәрендә ураза тоту турында әйтелә: «Кешеләрнең гамәлләре Аллаһка дүшәмбе һәм пәнҗешәмбе көннәрендә тәкъдим ителә, һәм мин үз гамәлләремнең ураза тоткан чагымда тәкъдим ителүен телим". Шулай итеп, яшь мөселманнар һәм мөслимәләр, Аллаһ Илчесе сөннәтенә иярү өчен, бергә җыелды.
Бүгенге ифтарда авыз ачкан вакытта мөбарәк җомга да килеп җитте. Бу уңайдан ифтарда катнашучылар өчен кызыклы программа әзерләнгән иде. Чакырылган кунаклар Шәех Али Ибодов һәм Әхмәд остаз Әбү Яхъя егетләр һәм кызлар белән аралаштылар, шәүвәл аеның өстенлекләре, яшьләрнең тормыш мәгънәсе турында сөйләделәр.
