Иртәгә, шәүвәл аеның 24 нче көнендә (5 нче июньдә), «Казан ярминкәсе» мәйданчыгында «Ислам нуры – Луч ислама» мөселман мәдәнияте күргәзмәсе кысаларында ТР мөселманнары Диния нәзарәтенең ислам турындагы ачык лекторие үз эшен дәвам итәчәк. Киләсе лекцияләр «Иман һәм акыл: Коръән фәнгә каршы киләме?» һәм «Эволюция теориясе: Ислам карашы» дигән темаларга багышлана.
Танылган Казан вәгазьчесе һәм Ислам галиме, ТР мөселманнары Диния нәзарәтенең шәригать мәсьәләләре бүлеге белгече, Казан ислам университеты мөгаллиме, рус телендәге “Калям Шариф. Перевод смыслов” һәм “Сахих әл-Бухари в версии Зубдат” кебек бестселлер басмаларның редколлегияләре әгъзасы Әхмәд Әбү Яхъя әл-Хәнәфи, мөселманнарны гына түгел, башка мәдәният һәм дин вәкилләрен дә борчый торган темаларга лекцияләр укый. Фәнни-популяр лекцияләр исламның асыл кыйммәтләрен һәм мәгънәләрен ачып бирә, җәмәгатьчелекнең күп кенә сорауларына җавап бирә, Исламнан куркырга кирәкме-юкмы икәнлеген аңлата һәм бу бөек дин турында формалашкан стереотипларны җимерә.
Әбү Яхъяның киләсе ачык лекцияләре 6 июньдә дә 12.30-14.00 сәгатьләрдә булачак. Алар «Ислам һәм феминизм» һәм «Сак булыгыз: секталар!» темаларына багышлана.
Лекцияләр «Казан ярминкәсе» территориясендә 3 нче павильонда укыла. Керү ирекле.
