Бүген, Шәүвәл аеның 29 көнендә (10 июньдә), Татарстан Республикасы Хөкүмәте Йортында ТР Президенты Рөстәм Миңнеханов Россия мөселманнары Дини җыены башлыгы, Мәскәү шәһәре мөселманнары Диния нәзарәте һәм “Мәскәү мөфтияте” Үзәк төбәге рәисе, мөфти Әлбир хәзрәт Крганов белән очрашты. Очрашуда шулай ук Татарстан мөфтие Камил хәзрәт Сәмигуллин һәм Татарстан Президенты аппараты җитәкчесе Әсгать Сәфәров катнашты.
Әңгәмә барышында милләтара һәм динара татулыкны ныгыту өлкәсендә багланышлар, ислам мәгарифен үстерү, шулай ук 2022 елда Идел буе Болгар дәүләтендә ислам динен кабул итүнең 1100 еллыгын үткәрүгә әзерлек мәсьәләләре буенча фикер алышынды.
Исегезгә төшерәбез, ТР мөфтие Камил хәзрәт Сәмигуллин Идел буе Болгар дәүләтендә Ислам кабул итүнең 1100 еллыгын бәйрәм итү буенча оештыру комитеты составына кертелде
ТР Президенты матбугат хезмәте материаллары буенча
