Бүген, зөлкагъдә аеның 7нче көнендә (17нче июньдә), Татарстан мөфтие Камил хәзрәт Сәмигуллин һәм аның беренче урынбасары Илфар хәзрәт Хәсәнов Үзбәкстанга эш сәфәре кысаларында Бохара шәһәрендә шәех Баһаветдин Нәкышбәнди исемендәге комплекста булды. Аларны Бохара губернаторы урынбасары Эркин Мәҗидов, “Мир-и Араб” югары уку йорты ректоры Хәйдәрхон Йүлдошходжаев, Бохара шәһәренең баш имамы Отабек Авезов, Үзбәкстан мөселманнары Диния нәзарәте вәкиллеге җитәкчесе – баш имам Элоф Жобер озата йөрде.
Комплекс территориясендә урнашкан мәчеткә килеп җитүгә, кунаклар өйлә намазы укыды, аннан соң дин кардәшләребезгә Камил хәзрәт Сәмигуллин вәгазь сөйләде, шулай ук имам Нәкышбәнди кабере янында Коръән укыды һәм дога кылды. Соңрак үзбәк коллегалары белән бергә Татарстан мөфтие һәм аның беренче урынбасары хезмәттәшлекне үстерү мөмкинлекләре һәм татар халкы тарихында мөселман мәдәниятен үстерүдә «Мир-и Араб» югары мәдрәсәсенең роле, әлеге мәдрәсәнең 500 еллык юбилеен үткәрү турында фикер алыштылар. Юбилей чараларында Татарстан делегациясенең дә катнашуы көтелә.
