Мөслим мөхтәсибәте Җәмигъ мәчетенә йөрүче дин кардәшләр һәм район халкы белән бергәләп махсус хәрби операция солдатлары өчен зур тырышлык куеп гуманитар ярдәм әзерли. Әлеге хәйрия акциясенә җиң сызганып алынучыларның берсе – Мөслим мөхтәсибәтенең җәмәгатьчелек белән элемтәләр белгече Илүсә Исламова. Аның җитәкчелегендә хатын-кызлар сугышчыларга җибәрү өчен кием-салым җыя һәм тегә, урын-җир кирәк-яраклары һәм озак сакланучы азык-төлек (чәк-чәк, токмач, сохари) әзерли.
Моннан тыш, алар солдатларга озак яна торган шырпылар (14 минут яна), “коры” душ, тозлы бәйләвечләр ясый.
Махсус хәрби операция солдатлары өчен гуманитар ярдәм җыюда гаиләләре белән катнашучылар да бар, әйтик, Мәлләтамак авылында яшәүче Фәнзилә һәм Наил Рәхимовлар үләннәр киптерү һәм хуш исле чәйләр ясау белән шөгыльләнә. Рәхимовлар, бу эшкә якыннарын җәлеп итеп, кипкән алма, бәрхет гөл, чамбыр, ике төрле мәтрүшкә, бөтнек, пион, ромашка, лимонник салынган 1000нән артык кап әзерләгән.
Тойгелде авылыннан Нурия Гыйльфанова берүзе 200 кап хуш исле чәй җыеп әзерләгән, 400дән артык шырпы һәм 100 данә “коры” душ ясаган.
Баланлы авылыннан Илһамия Гәрәева 200 тәсбих ясаган, үлән чәйләре һәм токмач әзерләгән. Атлас авылыннан Ризида Фәсхиева 60 банка тозлаган әйберләр, томалап пешерелгән ит һәм кайнатма җибәргән.
