Бүген, җөмәдәл-әүвәл аеның 24нче көнендә (26нчы ноябрьдә), Татарстан Мөфтие Камил хәзрәт Сәмигуллин Нәзарәттә Мордовия Республикасы мөселманнары Диния нәзарәте рәисе, Мөфти Раил хәзрәт Әсаинов белән очрашты. Очрашуда катнашучылар арасында Мордовия Мөфтие урынбасары, имам-мөхтәсиб Рәшит хәзрәт Абдрәшитов һәм имам-мөхтәсиб Раил хәзрәт Мусин да бар иде.
Мордовия Мөфтие Камил хәзрәткә очрашуга үзенең вакыт тапканы һәм күп вакытын танышуга, тәҗрибә уртаклашуга һәм киләсе елга планнар турында фикер алышуга багышлаганы өчен рәхмәтен белдерде.
Очрашу вакытында Мөфтиләр ике дини оешма арасында хезмәттәшлек мәсьәләләре турында фикер алышты. Эшлекле мөнәсәбәтләрне ныгыту һәм хезмәттәшлек буенча фикер алышу өчен планнар билгеләнде.
Кунаклар белән очрашуда Камил хәзрәт Татарстан Республикасы мөселманнары Диния нәзарәтенең күпкырлы эшчәнлеге турында сөйләде. Ул Татарстан мөфтияте, мөселман мәгарифе баскычлары һәм аның төп үзенчәлекләре турында бәян итте, Нәзарәтнең Голәмәләр шурасы эшенә аерым тукталды һәм ислам финансларына игътибар бирде. Шулай ук Казыйлар шурасы һәм шәригать бүлеге эшчәнлеге мәсьәләләре дә күтәрелде. Камил хәзрәт фәтвалар чыгару тәртибе турында мәгълүмат белән уртаклашты, «Гыйбадәт кылулар һәм дини йолалар уздыру турында нигезләмә» әзерләү һәм онлайн-мәдрәсә эшчәнлеге турында әйтеп үтте. Кунаклар дини кадрлар әзерләү системасы һәм имамнарны аттестацияләү тәртибе хакында белде. Алар Татарстандагы мәчет каршындагы курслар һәм балалар өчен рухи-сәламәтләндерү программалары турында сораулар бирде. Кунаклар дәгъвәт өлкәсендә тәҗрибә уртаклашуга өметен белдерде.
Мөфти Камил хәзрәт кунакларга ТР мөселманнары Диния нәзарәтенең «Хозур» нәшрият йортыннан китаплар бүләк итте һәм, «Мөхәммәдия» мәдрәсәсен күрсәтеп, шәкертләрнең белем алуы турында тәфсилләп сөйләде.
Мордовия Мөфтие Раил хәзрәт Әсаинов, үз чиратында, ике дини оешма арасында килешү имзалануга өметен белдерде һәм Камил хәзрәтне Мордовия мөселманнары Диния нәзарәтенең 2025 елда билгеләп үтеләчәк 25 еллык юбилей чарасына чакырды.
