Татарстанда һәм Россиядә хәләл индустриясен үстерү ТР мөселманнары Диния нәзарәте эшчәнлегенең өстенлекле юнәлешләренә карый һәм Нәзарәтнең “Хәләл” стандарты буенча комитет тарафыннан гамәлгә ашырыла. Комитет хәләл өлкәсендә илдә иң принципиаль һәм катгый рәвештә сертификацияләүче органнарның берсе булып тора.
2024 елда хәләл сертификацияләүне үстерү өлкәсендә ТР мөселманнары Диния нәзарәтенең иң мөһим эш нәтиҗәләреннән берсе булып «Хәләл» стандарты буенча комитетның Gulf Accreditation Centre (GAC) үзәгендә аккредитацияләнүе тора. GACта аккредитация турында сертификат алу ТР мөселманнары Диния нәзарәтенең «Хәләл» стандарты буенча комитетының Фарсы култыгы илләрендә сертификацияләү буенча компетентлы орган булып танылуын раслый. 2025 елда Татарстан Республикасы мөселманнары Диния нәзарәтенең «Хәләл» стандарты буенча комитеты Фарсы култыгы илләренең һәрберсе белән элемтәләр урнаштырырга һәм өстәмә нотификация процедурасын узарга ниятли.
Моннан тыш, 2024 елда Комитет Росстандартта «Мөслим Френдли» ирекле сертификация системасын теркәде. «Мөслим Френдли» ирекле сертификацияләү системасы объектлары булып сәүдә, кунакханә, туристлык, медицина хезмәтләре тора.
Шулай ук 2024 елда Татарстан Республикасы мөселманнары Диния нәзарәтенең «Хәләл» стандарты буенча комитеты Казан дәүләт аграр университеты белән хезмәттәшлек турында килешү имзалады. Хезмәттәшлек чараларда катнашуны, чараларны бергәләп оештыруны, хәләл индустрия мәсьәләләре буенча уртак тикшеренүләрне үстерүне, һөнәри әзерлек программаларын оештыруны һәм мәгълүмат алмашуны күздә тота. КДАУ меморандум имзаланган дүртенче уку йорты булды. Фәнни җәмәгатьчелек белән хезмәттәшлек нәтиҗәсендә хәләл индустрия һәрьяклап үсеш кичерә. Элегрәк Комитет тарафыннан КИИТУ, КДМУ, КДВМА белән меморандумнар имзаланган иде. Комитет әлеге университетларның фәнни җәмәгатьчелеге белән тыгыз хезмәттәшлек итә.
2024 ел нәтиҗәләре буенча комитет реестрында 220 сертификацияләнгән предприятие, оешма һәм эшкуарлар теркәлде. Шул ук вакытта 2024 елда Комитет контролен узуга гариза биргән 230 предприятиенең 180 е генә расланды. Бу Комитетның җитештерүгә куелган югары таләпләрен һәм бер үк вакытта Россия бизнес җәмәгатьчелегенең хәләл тармагы белән актив кызыксынуын күрсәтә. Сертификатлар азык-төлек, көнкүреш химиясе, косметика җитештерүчеләренә, җәмәгать туклануы предприятиеләренә, кунакханә һәм шифаханәләргә, туризм һәм медицина хезмәтләре күрсәтүче учреждениеләргә бирелде.
«Россия – Ислам дөньясы: KazanForum 2024» халыкара икътисади форумы кысаларында “Казан Экспо” халыкара күргәзмәләр үзәгендә – Russia Halal Market халыкара күргәзмәсе, Казанның Агросәнәгать паркында Kazan Halal Market хәләл продукция ярминкәсе узды. «Хәләл» стандарты буенча комитет продукцияне һәм хезмәт күрсәтүләрне тикшерү, шулай ук сату нокталарында «Хәләл» нормативларын кертү буенча бөтен эшне башкарды. Комитет маркетның барлык сату нокталарында «Хәләл” стандартларын гамәлгә кертте. Моның өчен Агросәнәгать паркында дуңгыз ите сатудан алынды, ритуаль чисталыкка ирешү өчен бина һәм җиһазлар җентекләп чистартылды, хатын-кызлар һәм ир-атлар өчен аерым намаз уку урыннары булдырылды.
Комитетта югары әзерлекле 17 эксперт эшли. Комитет хезмәткәрләре сертификация һәм аккредитация буенча төрле белем бирү программалары кысаларында даими рәвештә белемнәрен арттыра. Дүрт белгеч Росаккредитациянең техник экспертлары булып тора, 4 белгеч-экспертның ирекле “Хәләл” сертификация системасы таләпләренә туры килүен раслау буенча алты елдан артык эш тәҗрибәсе бар. Биш белгеч-эксперт югары ислам шәригать белеменә ия. 2024 елда Комитетның дүрт хезмәткәре Казан илкүләм тикшеренү технология университетының азык-төлек технологияләре факультеты магистратурасын тәмамлады.
ТР мөселманнары Диния нәзарәтенең “Хәләл” стандарты буенча комитетының шәригать буенча Эксперт советы 2024 елда хәләл өлкәсенә караган мәсьәләләр буенча 30 шәригать карары чыгарды.
Комитет белгечләре, таныклык биргәнче, ислам кануннары буенча җитештерү тәртибе турында җентекләп аңлату эшләре алып бара. Таныклык тапшырылганнан соң, Комитеттан билгеләнгән күзәтчеләр сертификацияләнгән оешмаларны даими тикшереп тора, кешеләр гаебе белән килеп чыккан кимчелекләр тиз арада ачыклана һәм бетерелә.
Хәләл сертификацияләү предприятиеләргә клиентлар базасын киңәйтергә мөмкинлек бирә – хәләл товарлар яки хезмәтләр мөселманнар һәм дөрес яшәргә омтылучылар арасында актив тарала.
