Бүген, Раҗәб аеның 17нче көнендә (17нче гыйнварда), Татарстан Мөфтие Камил хәзрәт Сәмигуллин шәех, күренекле ислам галиме, Пакьстан голәмәләре шурасы әгъзасы Мөхәммәд Әсад Әл-Мәдни белән очрашты.
Очрашу барышында Мөфти Камил хәзрәт татар дин галимнәре калдырган мирасны өйрәнү һәм аны саклауның әһәмиятен билгеләп узды. Ул билгеләп үткәнчә, кичә Казанда Шиһабетдин Мәрҗанине искә алу чаралары үткәрелде.
Әңгәмә барышында Камил хәзрәт шәехкә Шиһабетдин хәзрәт Мәрҗанинең әтисе – Баһаветдиннең кулъязмасын эзләп табуда ярдәм сорап мөрәҗәгать итте, чөнки ул Пакьстанда сакланып калган булырга мөмкин дигән фараз бар. Камил хәзрәт шәехкә хәбәр иткәнчә, Мөфти Тәкый Усмани үзенең “Фәтхел Мөлхим фи шәрхи Мөслим” китабында (6нчы томда) Шиһабетдин Мәрҗанинең әтисе Коръән фәннәренә багышланган (бу китапның исеме әлегә билгеле түгел) китабын телгә алган.
Моннан тыш, мөхтәрәм кунак Татарстан мөселманнары Диния нәзарәте эшчәнлеге, аерым алганда кадрлар әзерләү системасы белән танышты. Ул Камил хәзрәт белән әңгәмә корды, сораулар бирде. Мөхтәрәм кунак Казан мәдрәсәләрендә һәм мәчетләрдә булырга ниятли.
Очрашу истәлеге итеп Мөфти хәзрәт кунакка “Казан басмасы”н һәм Нәзарәтнең “Хозур” нәшриятында гарәп телендә басылган китапларны бүләк итте.
