15 июльдә Татарстан мөфтие Камил хәзрәт Сәмигуллин Түбән Камага эшлекле сәфәр кылды. Мөфти хәзрәтләре район мөхтәсибәте эшчәнлеге белән танышты, шәһәр мэры белән очрашты һәм ифтар ашында катнашты.
Камил хәзрәт шәһәр мэры Айдар Метшин белән Җәмигъ мәчетендә очрашты. Әлеге чарада Түбән Кама мөселманнарына кагылышлы мөһим сораулар хакында сөйләшенде. Шулай ук сүз Гагарин урамында алып барылган мәчет төзелешен тәмамлау хакында барды. Әлеге иман йортын төзеп бетерергә акча табу һәм төзелешне тизләтү кирәклеге ассызыкланды. Әлеге мәчеттән тыш Түбән Камада тагын бер иман йортын төзү нияте бар. Район мөхтәсибе Йосыф хәзрәт Дәүләтшин Камил хәзрәтне һәм Айдар Метшинны мәчетләрнең төзелеш проектлары белән таныштырды.
Очрашу вакытында мөфти шәһәр мэрына мөселманнар белән хезмәттәшлеге һәм җирлектә башкарган күркәм эшләре өчен рәхмәтен белдерде. "Хузур" нәшрияты әзерләп бастырган китапларны бүләк итте.
Шуны да әйтергә кирәк, чарада мөфтинең беренче урынбасары Рөстәм хәзрәт Батыр, Социаль тернәкләндерү һәм адаптация үзәге директоры Азат Гайнетдинов катнашты.
Кич исә мөфти һәм мөхтәрәм кунаклар катнашында "Рамазан шатры"нда олуг ифтар мәҗлесе үткәрелде. Ифтарга 650 мөселман кардәшебез җыелган иде.
