Татарстан мөселманнары Диния нәзарәте Казаннан һәм республиканың төрле районнарыннан мөселманнарны Изге Болгар җыенына алып баруны оештырды. Болгарга барырга теләүчеләр "Болгар", "Мәрҗани", "Гаилә", "Ярдәм" мәчетләре, нәзарәт яныннан дистәләгән автобусларга утырып юл тоттылар.
"Ярдәм" мәчете тарафыннан күзләре күрмәүчеләргә һәм физик мөмкинлекләре чикле булганнарга да җыенда катнашу мөмкинлеге булдырылды.
"Без тарихи шәһәр Болгарга беренче тапкыр бардык һәм җыенда катнаштык. Нәкъ менә Татарстанда ике тарихи үзәк - Болгар һәм Свияжск үсеш алуы сөендерә. Чараларны оештыручыларга инвалидлар рәхмәтле", -диде Казан шәһәренең Юдино бистәсе инвалидлар җәмгыяте җитәкчесе Татьяна Николаева.
Шулай ук Татарстан районнары мәчетләре мөселманнарны Болгарга килер өчен транспорт белән тәэмин итә алды. Шулай итеп, меңләгән мөселманнар бабаларыбызның ислам динен кабул итүенә багышланган җыен шаһитлары булдылыр.
