21 ноябрь көнне “Алтын урта” яшьләре Пермьнән килгән каллиграф – Эдуард Димасов белән очрашты. Эдуард – яшь булуына кармастан, инде танылырга өлгергән каллиграф. Чит илләрдән төрле оешмалар заказ белән дә мөрәҗәгать итәләр үзенә. Эдуард Димасов 20се көнне узган “Ислам граффити фестивале”ндә дә катнашкан иде.
Яшьләр каллиграфның эшләре белән танышты, аңа күптөрле сораулар бирде, үз фикерләре белән уртаклашты. Эдуард үзенең классик стильдә түгел, ә заманча, модерн стилендә эшләве турында әйтте. Чит илләрдә каллиграфик эшләнмәләрнең кыйммәт йөрүен, әмма Россиядә бу хезмәтнең түбән бәяләнүен билгеләп үтте Эдуард Димасов.
Очрашудан соң истәлекләр дәфтәренә “Алтын урта” дип, үз стилендә язып та калдырды Эдуард. Ул Казанда мөселман яшьләре өчен мондый җыелу мөмкинлеге һәм күптөрле чаралар булуына сөенүе турында әйтте.
