ТР МДН һәм Татарстан митрополитының яшьләр белән эшләү бүлекләре, яхүди һәм католик җәмәгатьчелеге белән берлектә "Экстремизм -юк!" айлыгы кысаларында велоузыш үткәрделәр. Велоузыш 11 сентябрьдә узды. Әлеге уртак чара Татарстанда төрле дин вәкилләренең үзара килешеп, тату яшәүләрен, шул ук вакытта ул татарстанлыларның экстремизм кебек тискәре куренешләргә каршы булуларын күрсәтте.
Яшьләр төркемнәре төрле урыннардан кузгалып киттеләр: мөселман яшьләре - Татарстан мөселманнары Диния нәзарәте бинасы яныннан, православие вәкилләре - Татарстан митрополиты яныннан, католиклар һәм яхүдиләр үзләренең гыйбадәтханәләре яныннан.
Барлык катнашучылар "Казан" загсы янында очрашып, тынычлыкны саклауга багышланган флешмобта катнашты.
Акцияне оештыру, үткәрү турында мәгълүматлар, фотолар «#мы_за_мир!» и «#We_are_for_peace!» хештег атамалары астында социаль челтәрләрдә урнаштырылды.
