Хөрмәтле укытучылар! Кадерле мөгаллимнәр, остазлар!
Әссәламүгаләйкүм вә рәхмәтуллаһи вә бәрәкәтүһү!
Татарстан Республикасы мөселманнарының Диния нәзарәте һәм шәхсән үз исемемнән Сезне ихлас күңелдән Укытучылар көне белән тәбриклим!
Кайсы гына чорны алсак та, укытучылар иң зур хөрмәткә лаек кешеләр булган. Хәнәфи мәзһәбен нигезләүче мәшһүр Әбу Хәнифә үз мөгаллимен шулкадәр хөрмәтләгән ки, хәтта йокларга яткач аякларын аның өенә таба сузып ятмаган һәм һәр кич аңа дога кылган. Укытучыларга Аллаһы Тәгалә һәм җәмгыять каршында зур җаваплылык йөкләнгән – алар үз укучыларына дөрес белем бирергә һәм үсеп килүче буынны лаеклы итеп тәрбияләргә тиешләр. Ислам динендә белем бирү – кешене Аллаһыга якынайтучы гамәл ул, чөнки остаз үзеннән соң укучыларына бәһасез интеллектуаль һәм рухи мирас калдыра. Шуңа күрә дә безнең пәйгамбәребез Мөхәммәд салләллаһу галәйһи вә сәлләм болай дигән: “Галим дәрәҗәсе гыйбадәт кылучыныкыннан шуның кадәрле өстен ки, Минем һәм сезнең арадан иң лаексыз кеше арасындагы аерма кебек. Кешеләрне яхшылыкка чакыручыларга Аллаһының рәхмәте ява, һәм аңа фәрештәләр, күк һәм җир әһелләре, хәтта кырмыска оясындагы кырмыскалар да дога кыла”.
Хөрмәтле укытучылар! Аллаһы Тәгалә сезне, белем ияләре буларак, бөекләде. Гыйлемегезне яхшылык һәм намус белән ирештерсәгез иде. Аллаһ бу авыр һәм игелекле юлыгызда сезгә Үзенең рәхмәтен һәм бәрәкәтен ирештерсә иде!
Татарстан мөфтие Камил хәзрәт Сәмигуллин
